Letter To Cee

Hello Cee. Saw a picture of you today. Payat ka na pala uli. Noong huli kasi tayong magkita, tumaba ka na. Nang magyakap nga tayo, nanibago ako. Pero ganoon pa rin ang init na naramdaman ko. Ang saya-saya ko dahil nagkita tayo. Kahit paano’y naibsan ang pangungulila ko. Pero sa bar na iyon, hanggang yakapan lang ang nangyari. Ni hindi kita nahalikan kahit gusto ko. I was with my friends at ikaw, may kasama nang iba. Boyfie, ang pakilala mo pa sa kanya. Pero alam mo, hindi nalingid sa akin ang mga mata mo na tila may ibig sabihin nang lumayo na ako. Sa tuwing susulyap ako sa kinaroroonan mo, nakatingin ka sa akin. Assuming ba? Pero di ba, sabi mo sa akin noon, kahit magkahiwalay tayo at magkaroon ka ng iba, mahal mo pa rin ako at hindi na iyon magbabago? Ako rin naman, hanggang ngayon, mahal pa rin kita at palaging naiisip. Hirap nga akong maghanap ng kapalit mo. Sige, aaminin ko na, umaaasa pa rin kasi ako na magkakabalikan tayo. Ikaw lang kasi ang nakakakilala sa akin nang lubos at sa’yo lang ako kumportable. Hind ko na kailangang magkunwari dahil tanggap mo ang mga kahinaan at kakulangan ko. Remember, nagkakilala tayo noon sa mga panahong ang dami kong insecurities. And yet, pinahalagahan mo ako. You saw right through me at ipinaramdam mo sa akin na espesyal  ako at karapat-dapat mahalin. Ang tagal ko na ring naghihintay mula nang magkita tayo pero hanggang ngayon, kahit isang text, wala pa rin akong natatanggap mula sa’yo. Ay, oo nga pala, nang gabi ring iyon, tumawag ka pero hindi ko nasagot. Sorry, lasing na lasing na kasi ako noon at ang ingay pa ng music. I wonder now: Ano kaya ang sasabihin mo? At bakit hindi ka na tumawag uli? Kung bakit hindi ako nag-return call, well, ayoko naman kasing magmukhang desperado. And, yes, pride na rin siguro (alam mo na isa ‘yan sa mga kapintasan ko). Sa ngayon, naghihintay pa rin ako. Kung tayo pa rin sa bandang huli, eventually, muli tayong magtatagpo. Bahala na. May kasabihan nga tayo: Pagkahaba-haba man daw ng prusisyon, sa simbahan pa rin ang tuloy. Sana nga. Kumusta na nga pala kayo ni Boyfie? Kayo pa rin ba?