Crisscross

Malayo pa, natanaw ko na si James na paparating. May kasama siya.

He looked good kahit sa malayo. Kakaiba ang aura niya.

Minahal ko si James at inakala kong mahal niya rin ako pero hindi pala. Tanggap ko na pero aaminin ko, may soft spot pa rin siya sa puso ko.

Natutuwa akong makita siya kaya nakangiti ako habang papalapit siya. Napangiti rin siya nang makita ako.

We hugged. At sa pagkakataong iyon, hinagkan niya ako sa pisngi.

Pagkatapos, ipinakilala niya sa akin ang kasama niya.

“Aris, I would like you to meet Jasper...”

“Hi, Jasper. Nice to meet you.”

“Same here, Aris.”

Nagkamay kami.

Cute chinito si Jasper. Fit ang pangangatawan. Maputi.

Umupo kami at umorder ng beer.

“Matagal na kayong friends?” ang tanong ko, casually.

“No,” ang sagot ni Jasper, nakangiti, sabay tingin kay James.

“Jasper is my boyfriend,” ang sagot ni James, nakangiti, sabay tingin sa akin.

***

Nagulat ako sa biglang pagsulpot ni Arvie. Mag-isa lang siya.

Si Arvie na minahal ni James kahit may mahal nang iba.

Nagulat din si James.

Nagkatinginan sila sandali. Arvie kissed him on the cheek.

Na-tense ako dahil nandoon si Jasper.

Kaagad na pinagkilala ni James sina Arvie at Jasper.

“Arvie… this is my boyfriend Jasper,” ang sabi.

May nasilip akong guilt sa mga mata ni James. At hurt sa mga mata ni Arvie.

“Hey, Arvie,” ang bulalas ko. “Asan BF mo?”

“Sinong BF?”

“Si Aussie.”

“Ah, wala na.”

“Anong wala na?”

“Bumalik na sa Australia.”

“So, single ka na uli?”

“Yup. And available.”

“Sayang naman,” ang sabi ko sabay tingin kay James.

***

Siksikan sa club at malayo kami sa isa’t isa. Hindi ko alam kung bakit sa dinami-dami ng tao ay sa kanya natuon ang pansin ko.

Nasa bandang likuran siya at nakatingin sa akin.

Nabighani ako sa kanyang gwapong mukha.

Nagtitigan kami. Nag-usap ang mga mata. Matagal.

Ipinagpasiya kong lapitan siya subalit hirap akong makadaan. Naharang din ako ng isang kakilala na sandaling chumika.

Pagtingin ko uli sa kinaroroonan niya, wala na siya.

Iginala ko ang aking paningin pero hindi ko na siya makita.

“Sayang naman,” ang sabi ko sa sarili.

***

Nagsayaw ako kasama ang mga kaibigan ko.

Naroroon din sina James at Jasper. Magka-partner sila at panay ang yakapan. Ang sweet nila.

Medyo nasobrahan na ako sa beer kaya parang lumulutang ang pakiramdam ko. Masyado akong na-carried away sa pagsasayaw ko sa “I Kissed A Girl”.

At dahil siksikan, nabangga ko ang isang nagsasayaw din. Napasulyap ako sa kanya.

At natigilan.

Ang gwapong nakatitigan ko kanina sa malayo!

Nagkatinginan kami. Nagkangitian.

Sabay pa kaming nag-“Hi”.

Nagharap kami. At nagsayaw.

Bago ko namalayan, magkayakap na kami at naghahalikan.

Katabi namin sa di-kalayuan sina James at Jasper. Naghahalikan din.

***

“Ako nga pala si Andrew,” ang pakilala niya sa akin.

“Ako si Aris,” ang pakilala ko sa sarili habang pinagmamasdan ko ang kabuuan niya. Higit siyang gwapo sa malapitan.

“I like you,” ang sabi niya.

“I like you, too,” ang sagot ko. And I meant it.

“Single ako. Ikaw?”

“Pareho tayo.”

“After tonight, maaari ba tayong mag-date?”

“Sure.” Nagsimulang bumilis ang tibok ng puso ko.

“I want to know you more.”

“Ako rin.”

“And maybe after, we can become boyfriends.”

“That’s an interesting possibility.”

May tumapik sa balikat ko. Si Arvie. Nanghihingi ng yosi.

Ipinakilala ko sa kanya si Andrew.

“Andrew…Arvie. Arvie…Andrew.”

“Hi, Arvie.”

“Andrew... Kumusta ka na?”

May na-sense akong familiarity sa kanilang dalawa.

“Magkakilala kayo?” ang tanong ko.

“Yeah,” ang sagot ni Arvie.

“Hindi mo naman siguro siya ex,” ang sabi ko sa kanya, jokingly.

“No,” si Andrew ang sumagot.

Ngumiti muna si Arvie bago nagsalita.

“Ex siya ni Aussie.”